مدينة جبل النار "" نابلـــــــــــــــــــس""

الموقع والتسمية

تتمتع مدينة نابلس بموقع جغرافي هام، فهي تتوسط إقليم المرتفعات الجبلية في فلسطين بصفة عامة، كما أنها ضمن سلسلة المدن الفلسطينية الواقعة على خط تقسيم المياه.

تقع المدينة عند التقاء دائرة عرض 32.13 0 شمالاً وخط طول 35.16 شرقا ويحدها من الشمال جبل عيبال وقرية عصيرة الشمالية، ومن الجنوب جبل جرزيم وقرية كفر قليل، ومن الغرب والشمال الغربي قرى زواتا وبيت إيبا وبيت وزن ورفيديا، أما من الشرق والجنوب فيحدها كل من سهل بلاطة وعسكر مروان الباذان وقرى روجيب وكفر بيتا وسالم ودير الحطب وعزموط.

الاسم وتطوره:
ورد ذكر نابلس في رسائل تل العمارنة وتقارير تحتمس الثالث باسم شاكمي "shakmi" وحرف الاسم إلى شكيم، وقد كانت أول رقعة نزل فيها إبراهيم عليه السلام بعد أن قدم من أور بالعراق، ثم سكنها يعقوب بن اسحق عليه السلام ويرجع اسم نابلس إلى نيابولس neoplolis وهي المدينة الجديدة التي أقامها الإمبراطور الروماني قسبازيان بعد تدمير المدينة القديمة .

حكايات قيلت عن الكنافة " الكنافة ترجع الأحباب "

من الحكايات القديمة التي يتداولها الناس ، بأن أحدهم غضبت عليه زوجته فغادرت منزله إلى بيت أهلها وبقيت فيه شهوراً سعى خلالها المصلحون ففشلوا فى إصلاحهما، فدخل شهر رمضان المبارك، وذكر الزوج زوجته وكنافتها وعلمت الزوجة كنافة وذكرت حب زوجها لها ولكنافتها فبعثت إليه بصينية كنافة كان تأثيراً أكبر من تأثير المصلحين فما كاد الزوج يتلقاها حتى ابتهج وحملها ومضى بها إلى بيت زوجته ليفطر معها، فما كادت تراه مقبلاً حتى هرعت إلى باب البيت تستقبله مع مدفع الإفطار الذي كان قد انطلق في تلك اللحظة فجلسا معاً يتناولا طعام الإفطار في لحظات سعيدة هانئة." على ذمة الراوي: الطريق إلى قلب الرجل معدته.. فما رأيكم إخوتي من الفصحاء الرجال؟؟"

يُقال ذلك ، وفيه قدر كبير من الصحة ، لكنّني أرى أن الطريق إلى قلب الرجل هو فطنة المرأة وذكاؤها ، ثقافتها ومعرفتها ، ولا أقول علمها فكم من متعلمة بليدة ، ليس للعواطف عندها قيمة ولا للمشاعر أهمية ، فما نفع طبيخها وإن أحسنته ؟!.

هذه بعض الروايات عن الكنافة النابلسية مدينة جبل النار "" نابلـــــــــــــــــــس"" Smile

االكنافه النابلسية في الشعر العربي

تلك الكُنافةُ ما ألذَّ مذاقَها =نابُلسُ يا بلدَ الكُنافة عُمري

إن الكُنافة لا ينالُ وصَالَها =إلا محبٌ أو عظيمُ القدرِ

فاقصدْ أبا سيرٍ بجاطِ كُنافةٍ =و ذُق حلاوةَ طعمِها في العَكْرِ

وإذا رغبتَ بأن تُنوع طَعمها =جرِّب أباظةَ والتقيَّ المصري

وبسيسُ كان من الأوائل رائداً =في صنعها وله جزيل الشكر

لكنما الفتفوتُ حصّل شهرة =بكُنافة تُبتاع بعد العصر

وَزُرِ الفَقيه مَعَ الصباحِ لكي ترى =رشَّ العجينةِ في المِراية يَجري

من اسم نابُلسَ الكُنافةُ سرُها =ولقد وصفتُ ولم أبُح بالسِّرِ

من أجل نابُلسَ الحبيبة إنني =أطلقتُ قيثاري وصادقَ شعري

الكنافه تسخر من القطائف

وهذه الكنافة بوجهها الأحمر الزاهي تسخر من القطائف قائلة:

غدت الكنافة بالقطائف تسخر=وتقول: إني بالفضيلة أجدر

طُويت محاسنها لنشر محاسني=كم بين ما يطوى وآخر ينشر

فحلاوتي تبدو وتلك خفية=وكذا الحلاوة في البوادي أشهرفمن يفضل الكنافة على القطائف؟؟

من حقها أن تسخر .. فلها وجه كوجه القمر ..فهي التباهي أولى وأجدر .. أما القطايف فتخجل أمامها وتتقهقر

[size=21]ويقول ابن نباتة المصري مادحا الكنافة :

ذكرتك والأسماءُ تذكر بالكنى = فلله يا أسما الكنافة والذكر

يذكر صحنَ الوجه صحنُ كنافة = هما الحلو ممَّا تشهد العين والفكر

ليالي فطر الصوم إذ كلّ ليلةٍ = بإحسان نور الدِّين عيدٌ هو الفطر

وأنعامهُ عندِي وشكريَ عندهُ = ولكن متى يوفي بإنعامه الشكر

إذا كانَ ذا جودٍ وشعرٍ مجيبني = وأحسن من شعري له ذاك الشعر

ولم أنسَ ليلات الكنافة قطرها = هو الحلو إلاَّ أنه بالسحب الغزر

يجود على ضعفي فأهتزُّ فرحةً = كما انْتفض العصفور بلله القطر

[/size]

مدينة جبل النار "" نابلـــــــــــــــــــس"" 6220_112488103409_17059058409_2908647_2827335_n

تحتفل الأمة الإسلامية هذه الأيام بذكرى الإسراء والمعراج, هذه الذكرى التي ستظل المصدر الذي يتشرب منها المسلمون الدروس والعبر ,وستظل الجرس الذي يذكرهم دائماً بدورهم تجاه انفسهم واتجاه دينهم واتجاه الناس جميعاً ,هذه الذكرى التى وقفت امامها العقول حائرة, معجزة جعلت اعداء الإسلام واقفين امامها بين مشكك ومصدق ليأتى قول الله ويحسم هذه القضية فيقول سبحانه وتعالى: "سبحان الذي أسرى بعبده ليلاً من المسجد الحرام الي المسجد الأقصى الذي باركنا حوله"

وكان لأهل مدينتي الحبيبه العزيزة الشامخة نابلس

عادات معينه في هذه الذكرى الخالده

ومن هذه العادات المميزه

موكب البيرق

والبيرق صورة عن علم الرسول صلى الله عليه وسلم يحمله احد "قبضايات" المدينة في احتفال ديني مهيب في مناسبة الاسراء والمعراج يبدأ من البوابة الشرقية حتى البوابة الغربية .
وكان حامل البيرق الذي يبلغ ارتفاع ساريته خمسة امتار يتهادى به يمنة ويسرى على شبابيك الدور وشرفاتها حيث كانت النسوة تعطرن البيرق وتشبكنه بالمناديل وهن يزغردن .
واما المحال التجارية التي كان يمر الموكب امامها فكانت تقدم الحلوى والسكاكر . وكان لهذا الموكب اهازيجه واغانيه الخاصة به .

الفقده يوم الاسراء والمعراج

وفي ذكرى الاسراء والمعراج يقوم الاهالي بالذهاب الى ابنائهم وبناتهم المنتزوجين واخذ الهدايا لهم
في ليلة الاسراء والمعراج ،، ويقومون بعزيمتهم على الغداء ثاني يوم وهو نفس يوم الاسراء والمعراج
ويقدمون الحلو بعد الغداء ويكون اما كنافة او فطير

مدينة جبل النار "" نابلـــــــــــــــــــس"" N17059058409_2277143_2103314

عادات وتقاليد فلسطينية لم يكن باستطاعة هذا الشعب تركها أو التخلي عنها، ومهما حدث ويحدث يعمد الفلسطينيون إلى إقامة مثل تلك العادات التي أصبحت عند الغير منبوذة.
ورغم تناسي الكثيرون لهذه العادات حتى وان كان فيها الخير، إلا أن "الشعبونية" في مدينة نابلس ما زالت تذكر القريب والغريب بطيبة الإنسان فيها، وحبه في عمل الخير وصلة رحمه التي قطعها غيره.
وجاء اسم "الشعبونية" – نسبة الى شهر شعبان- وهو تعد من العادات الخيرة التي امتاز بها أهل مدينة نابلس عن سواهم في بقية المدن الفلسطينية، وحافظوا عليها منذ سنين.
والشعبونية، هي عادة خيرة تقرب الأرحام بعضها ببعض، دأب عليها النابلسيون منذ عشرات السنين، حيث يقوم "كبير العائلة" – او من ينوب عنه من أبنائه- بدعوة صلة ارحامه كاخواته وبناته وبنات اعمامه وبنات عماته، وفي كثير من المرات يدعو عموميته من النساء وخاصة المتزوجات لاصهار غرباء عن العائلة، برفقة الأطفال الصغار، الى الاقامة في بيته مدة تتراوح من ثلاثة ايام الى أسبوع

تعد فيهن الولائم – للمقتدرين طبعا- وتقام السهرات الليلية والحفلات العائلية السامرة وتعيش تلك الاسرة الكبيرة في هناء وسرور.
ونظرا للتطورات المختلفة، فان هذه العادة اقتصرت فقط على يوم واحد عند الكثير من أهل المدينة، حيث يجمع فيها الأقارب ويأكلون ويشربون ويتسامرون.
ومع أنها في الظاهرة كانت مقتصرة على الميسورين والاغنياء الا انها انتشرت بين العائلات المتوسطة والفقيرة، لكن اتساعها لم يكن باتساع الفئة الاولى، فكانت مقتصرة على الرحم القريب دون البعيد، ولثلاثة أيام لا سبعة وعلى ما يوجد من طعام "عدس ومجدرة" لا الولائم والاطباق الشهية، وينام الجميع بعد العشاء فورا فلا تستمر لوقت متأخر.
وعادة ما يقدم بها أيضا أنواعا فاخرة من الطعام والحلويات المنزلية التي تعدها النساء في بيت الشخص الذي يقوم بواجب الشعبونية والعزائم، وتتسامر النساء وتتحدث حكايات وقصص أثناء إعداد الطعام وحتى وهن يقمن بتنظيف الأواني التي يأكلوا بها.

ويتحدث أهالي نابلس عن عاداتهم بلهف وشوق، فهم يعدونها من أعمال الخير الذي لا يستطيع أحد الاستغناء عنه، فالحاجة أم عبد الرحيم 70عاما ترجع بها الذاكرة إلى سني الماضي، ثم تبتسم قليلا ابتسامة المشتاق لحنين الماضي وتقول "لا زلت أذكر عندما كنا صغارا، حيث كنت اذهب أنا وأمي إلى بيت جدي، قبل يوم من موعد الشعبونية، حيث نلتقي بالجميع هناك، من شقيات أمي وأشقائها ونسائهم وأبنائهم، وكنا نقضي أياما جميلة في اللعب والتزاور.
وتضيف "كانت أمي وقريباتها يتناوبن على العمل في يوم الشعبونية، حيث يستيقظن منذ صلاة الفجر، ويقمن بإعداد الطعام من المعجنات والخبز الطازج الساخن، حيث يحضر هذا لطعام الفطور".
وتتابع النسوة عملها في تنظيف البيت بعد تناول الفطور -كما تقول أم عبد الرحيم- بكل انبساط ومتعة، ومن ثم يبدأن بإعداد وجبة طعام الغداء، وهي التي تشارك بها جميعهن لأنها كبيرة ولان الجميع سيأكل منها".
أما الشاب أحمد فقد اختار أول يوم من شهر شعبان لدعوة أمه وأخواته وقريباته من النساء.
وقال: "اخترت اليوم الأول في شعبان من شدة اشتياقي له وكي لا أنساه وحتى أكون أول المبادرين لدعوة أقربائي، وهذه المناسبة انتظرها بفارغ الصبر سنوي، حيث يلتقي الأهل والأحبة في بيتي وكل يحكي قصته وحكايته التي تعن بباله في تلك اللحظات الجميلة".
وأشار أحمد إلى أن التكاليف لأي عزومة في شعبان ليست بالكثيرة جدا وإنما هي ميسورة في معظم الأمور، وأن التكاليف مرهونة بمن يود القيام بالعزيمة وان هذا مردود لطبيعة الأمور التي يود شرائها وعملها لضيوفه

كتب عنها الكتاب
ويقول الكاتب النابلسي مالك فايز المصري، في كتابه "نابلسيات من بواكير الذكريات والوجوه والصور الشعبية": "لقد جرت العادة ان تدعى النساء من ذوي الرحم الى ولائم في بيوت الاهل يتم فيها اعداد هذه الاطعمة فتقبل النسوة الى هذه الشعبونيات – وأنا هنا أسجل الكلمة كما هي دارجة بينما تفرض القاعدة اللغوية بأن تسمى "شعبانيات" اي فرحات مسرورات".
وإذا كان الرجال مطالبون في الاعياد لزيارة بناتهن وقريباتهن لتقديم العيدية النقدية لهن، فكان لا بد من وجود مناسبات تقوم فيه تلك النسوة بزيارة "بيت العيلة" بدعوة منهم، وكان من هذه المناسبات شهر شعبان لقضاء ايام "الشعبونية".
وتعد الدعوة للشعبونية بالإضافة إلى كون المدعوين من ذوي صلة الرحم، أنها أيضا تعد من باب جبر الخواطر وخاصة للنساء، والتأكيد على أن الأهل لا يتخلون عن بناتهم اللواتي تزوجن أو خرجن من منزل الأبوة، وبهذا يقول الكاتب المصري: "ولست على يقين من أن دعوة النسوة هي بحافز صلة الرحم أو للمشاركة في اعداد الطعام المتنوع الذي يتطلب عددا وفيرا من النسوة الماهرات، ولكنني أميل الى الجمع بين الحافزين بدليل ان صلة الرحم كانت أمرا شائعا وتعتبر من علامات المرؤة والشهامة".
وتعد الشعبونية أيضا جولة بين الأقارب للتعارف على بعضهم أكثر وأكثر، وكما كان يتم فيها اختيار عرائس، حيث كانت توظف الشعبونية لاختيار عروس والتعرف عليها عن قرب، لذلك كانت الشعبونية مناسبة للتواصل العائلي وما ينجم عنه من أنشطة عديدة.
ومن أشهر أطعمة شهر شعبان أكلة الكوارع "الرؤوس والمقادم والكرش" واصناف الكبة واليخنة النابلسية والفسيخ والمفتول والمحاشي، فيجلس النسوة من أصحاب البيت والمدعوات كل تشارك في جانب من جوانب اعداد الطبخة وهن مرحات مسرورات لفرصة الاجتماع بما لا يقل عن فرحتهن بالاطعمة النادرة التكرار.
وتتبع "التحلاية" وهي أما الكنافة النابلسية المشهورة وأما الكلاز" أو ما يسمى بالكلاج المحشو بالجبن النابلسي أو المكسرات كالجوز، أيضا البقلاوة وأنواع أخرى من الحلويات، وجبات الغداء، تليها القهوة السادة لاعتقادهم انها تساعد على الهضم.
والشعبونية عادة خير يقوم بها أهالي مدينة نابلس، والهدف منها صلة الرحم، وتقديم المساعدة من كبير العائلة أو من ينوب عنه لأقربائه، وخاصة من النساء، فهن الأشد حاجة وخاصة الفقيرات منهن في العائلة.

غير جو مع أهل نابلس

مدينة جبل النار "" نابلـــــــــــــــــــس"" N17059058409_2307132_4799742

ختيارة في نابلس

بتشوفك وحدة ختيارة في البلد
كيفك خالتي ؟؟
اهلين حجة
مش انتا ابن فلانة
اه بالضبط
مش ابوك فلان خالتي
هلاء كنتكوم بتكون بنت خالت ابن عمتي
فهمت خالتي
اه فهمت ول
مدينة جبل النار "" نابلـــــــــــــــــــس"" Tongue

منتا عارف نابلس شبكة يا خالتي
احكيلي يا خالتي شو بتعمل
بدرس يا خالتي
وين ؟؟
في الجامعة
بدرسك الاستاذ فلاني الفلاني
اه
هذا بكون سلف كنتها لبنت عمتي
اقعد حلل يا ولد
وهيك
اغلب الختيارات الكبار
لازم يعرفو اصلك وفصلك
لا حتى بكونوا عارفين
كل شيء

بس والله مافي احلا من حكيهم
يا عمي

غير جو مع اهل نابلس

مدينة جبل النار "" نابلـــــــــــــــــــس"" N17059058409_2323150_3598260

رفيديا

رفيديــــا

مدينة جبل النار "" نابلـــــــــــــــــــس"" 4322_89754118409_17059058409_2520665_7708104_n

طبعا رفيديا
بالصيف قبل 12 ما بتسكر
رفيديا هي الجزء المسائي من المدينة
يعني على 6 بتبلش الحياة فيها

في الصيف رفيديا بتنتعش
الشباب
الوو : كيف
هلا حبيبي شو رئيك ننزل اليوم
على رفيديا
نكزدر ( نتمشى ) اه
خلص على 6 بتصل فيك

الصبايا
الو كيفك يا فلانة
هلا هلا
شو ننزل اليوم نتمشى
في رفيديا
اه مننزل
ليش لا

طبعا التمشي انواع في مشي وفي بسيارات
السيارت بتكون معلية المسجل
وصوت الدس الدس يعني الطبلة طالع
وبكون اخينا ماخد راحته
او طاير
والسيارة مليانة
شباب
فايعين يا عمي
وفي بمشوا كزدرة

مدينة جبل النار "" نابلـــــــــــــــــــس"" 4322_89754093409_17059058409_2520660_7059341_n

مدينة جبل النار "" نابلـــــــــــــــــــس"" 4322_89754093409_17059058409_2520660_7059341_n

هلاء لما بتنزل على رفيديا في خيارات
ازا كان وضعك المادي عادي
يعني اخر الشهر
ما الك الا سندويش فلافل من عند ابو سامر

وازا قابض جديد من عند العطوط حبت بيتزا
او شاورما من عند بيكر
وبعدا كاسة كوكتيل من عند فخفخينا
هيك بتكون تمام

رفيديا

وهلأ دور الحمامات في نابلس وطبعا زي مابتعرفوا نابلس اكثر مدينة شبية بالشام
بكلشي تقريبا
والحمامات التركية الموجودة في البلد
حمام الشفاء والسمرة وغيره
كلها حمامات اثرية
طبعا زمان الحمام كان له عزه

مدينة جبل النار "" نابلـــــــــــــــــــس"" N17059058409_2299716_805611

مدينة جبل النار "" نابلـــــــــــــــــــس"" N17059058409_2299716_805611

زمان كانو يروحو على الحمام اسبوعيا طبعا
يجتمعوو في الشباب
ويتحمموا
وبعد الحمام يكون العشا جاهز
والاغاني الشعبية
اجواء رائعة

طبعا لنساء ايام محددة في الحمام
وللرجال ايام محددة

السنوان كانو يروحو على الحمام في ايامهم المخصصة
وفي شي اسمه اسبوع
يعني بعد اسبوم من الولادة
بتروح الام بتعزم حبايبها على الحمام
طبعا من الصبح بروحو على الحمام
وبعد مايحمموها
بكون الاكل جاهز
وبقعدوا يغنولها

هاي العادة طبعا الان راحت بح
مدينة جبل النار "" نابلـــــــــــــــــــس"" Frown

المهم

الرجال كمان
كانو ياخدو العريس على الحمام
ويحمموه ويزينوه ويغنولوا
يوم عرسه

مدينة جبل النار "" نابلـــــــــــــــــــس"" 4491_91089343409_17059058409_2540583_3019324_n

مدينة جبل النار "" نابلـــــــــــــــــــس"" 4491_91089343409_17059058409_2540583_3019324_n

طبعا حاليا الحمام
صار تراث للاسف وقليل منا بروح عليه
طبعا الحمام في
قعدة في نص الحمام
بتكون مثل غرفة الاستقبال فيها قعدات عربية
واراجيل
وقهوة وشاي
وفي غرف مقسم
كل غرفة لوحدها
اضافة الا غرفة التدليك
والبخار
وهاي خدمات اضافية

للـ

VIP

مدينة جبل النار "" نابلـــــــــــــــــــس"" N17059058409_2313382_4373573

في العاب كثير مشهورة عنا في العاب لازالت موجوة
وفي العاب ماسمعت فيها

اللعبة الاكثر شهرة
على مستوى نابلس ولازالت حتى الان
طبعا البنانير
البنانير لعبة مميزة جدا للاطفال

طبعا في اكثر من طريقة للعب البنانير
وفي بنانير انواع اشهرها الحلبي
طبعا الاطفال بكونوا مجمعين بنانيرهم في مرتبان زجاج
وكل يوم بعد العصر بلتقوو وبلعبووو فيهم
في موسم معين للعب البنانير
مثل هالايام

يقع قبر يوسف على اراضي قرية بلاطة البلد منطقه أ وكان فيه مدرسة دينية يهودية تضم العديد من الجنود والمستوطنين المتطرفين الذين يرتادونه يوميا بدعوى التعبد والدراسة الدينية .

مدينة جبل النار "" نابلـــــــــــــــــــس"" 625829563

وتشير الدلائل الى اسلامية المكان حيث يوجد به محراب للصلاة تم اغلاقه بالاسمنت ويشير شكل المقام والقبرالى ان عمره يقدر بحوالي 200 سنة على ابعد تقدير وليس الفي عام كما يزعم المستوطنون وهو الزمن الذي يفصلنا عن تاريخ وفاة النبي يوسف عليه السلام .

مدينة جبل النار "" نابلـــــــــــــــــــس"" 437388132

قبر يوسف عام 1914

وقد تم تسجيل المقام كوقف اسلامي في سجلات اراضي نابلس تعود ملكيته لدائرة اوقاف نابلس تحت اسم مقام النبي يوسف قطعة رقم 10 حوض 5 بمساحة اجمالية مقدارها 661 مترا مربعا وتوضح الروايات التاريخية وجود اكثر من مقام باسم يوسف ففي الخليل يوجد مقام وكذلك في طبريا اضافة الى موقع قرية بلاطة .

مدينة جبل النار "" نابلـــــــــــــــــــس"" 512579742

قبر يوسف عام 1856

ويقول اهالي قرية بلاطة ان اليهود كانوا يزورونه قبل عام 1948 بطريقة سرية وبدأوا بعد الاحتلال عام 1967 يحضرون في المناسبات والاعياد بحشود تحت حراسة عسكرية تلا ذلك اقامة نقطة عسكرية عام 1976 على سطح المقام ثم توج الحدث عام 1986 باعلان المقام مدرسة دينية يهودية .

مدينة جبل النار "" نابلـــــــــــــــــــس"" 867206471

قبر يوسف عام 1914

وفي العام 1990 اعلنت الحكومة الاسرائيليه عن اقامة نواة استيطانية داخل المقام بتواجد عسكري دائم ومكثف خلال ساعات الليل والنهار وفي العام 1991 اغلق المحراب بالاسمنت تحت حماية قوات الجيش التي صممت على اجراء تغييرات جذرية فيه .

مدينة جبل النار "" نابلـــــــــــــــــــس"" 873979859

وكانت مفاتيح المقام قد سلمت في العام 1323 هجري من السلطان عبد الحميد الثاني الى عائلة فياض عبد الله دويكات من قرية بلاطة بوثيقة سلطانية حيث اشرفت العائلة عليه حتى عام 1983 عندما فصل القيم على المقام من عمله .

ودارت مواجهات عنيفة ودامية في ايلول عام 1996 ابان احداث النفق استشهد فيها مواطنان وقتل فيها حوالي 9 جنود حيث رفع الشبان العلم الفلسطيني على برج المراقبة الصهيوني في المكان وتمت اقامة الاذان في اول مرة منذ عشرات السنين .

خطوات الزواج في نابلس الحلقة الاولى

اذا بدك تتزوج في نابلس

المهم اذا بدك تتزوج في نابلس و تم اختيار بنت الحلال
الخطوة الاولى بتقعد تلفلك شوي حولين امك وابوك تلمح للموضوع
وخاصة امك اه يما شو رئيك بفلانة ؟؟
اه والله منيحة بس عينها كبيرة منخارها طويل وخود حكي النسوان
بس بتقنع امك
وبتروح بتحكي ل ابوك شو رئيك نخطبله
بحكيلها شوف العكروت صار بدو يتزوج
على بركة الله
بكرة بتاخدي حماتك وامك وبتروحوا عند اهل العروس
طبعا تنسيش تاخدي موعد يا حرمه
المهم بتنام سعيد هديك الليلة يا امور
تاني يوم بعد العصر بروحو الكتيبة على دار العروس
دق دق دق
مين اهلين ام احمد كيف حالكوم
وخووود حكي 3 ساعات ولسا مش داخلين في الموضوع
والعروووس المسكينة بتسنا بدها تفوت
المهم واخيرا ام العريس
والله يا ام احمد بدنا نشوف بنتكم
اه ولمين بدك اياها
لا بني
اه شو بشتغل ؟؟
كم طوله ؟؟ كم عرضه ؟ كم وزنه ؟؟ حلوو ؟؟
مخابرات يا اخي
المهم
بتخرج العروس
الحماة والام بتوشوشوا شوفي شعراتها زي المكنسة
شوفي عينها زي الجوزة بس
مالنا ومال الحكي حلوة
المهم باخدو موعد للعريس
يشوفها
وعشان يردولهم جواب لسا
بعد 3 ايام
اتفضلوووو عنا
بعد مايسالو على العريس ويلاقوو ما مالوو شي
ماعنا مانع

خطوات الزواج في نابلس الحلقة الثانية

المهم يا عمي
بعد ما تتصل ام العريس وهذا الي غالبا بكون
تسال شو صار يتفضلوا او لاء
بعدها بتروح (العريس) زيارة مع امك وخالتك وستك وستك
عند العروس بدوا يشوفها ( اكيد شايفها قبل هالمرة ) بحطش بذمتي
باخدو موعد وبروحو
هلا هلا نورت تفضلووو
بقعددوو وحضرتك اخر واحد بتسلم عليك حماتك
يادلي على الادب ( كيفيك مرت عمي )
المهم بقعدوو وعين ربي تحرسهم
بعد 5 دقائق بيجي الشاي
وبعدها ببلشو حكي النسوان والعريس المسكين
حاطط ايده على خده بعدين هي طويلة
ساعة ساعة ونص
بعدها بيجي الفرج بتطل العروس وبتقعد بعيدة عنو كنباية طبعا
وبصيروو يحكوووا
غرررررر غرررررر
الله اعلم شو بحكو
كيفك ؟؟
منيحة
كيفك ؟؟
منيح
خلص عرفووو بعض
هههههههه

المهم
خلصت الزيارة وقامو الجماعة مروحين بالسيارة بتساله امه
شو يا ماما شو رئيك فيها ؟؟
كيف شفتها ؟؟
حلوةة امي والله حلوة
بتنط ستك يا شيخ والله في احلا ليش مستعجل
خلص ستي مشيها مش انا الي بدي اتزوج
المهم بوصل على البيت
وبحكو للابوه شو صار
وبعديها بردو بستنوا تلفون انه العريس موافق رسمي اذا طبعا ما غمز
امه بنفس الجلسة انه تطلبها
اذا طلبتها بنفس الجلسة بستنوا تاني كم يوم تلفون من اهل العروس
اذا ما طلبتها بنفس الجلسة ام العريس بترد تتصل عليهم تقولهم اوكي او فش نصيب
وبردو يروحو تاني زيارة علشان قراءة الفاتحة
وبكونو عمامه وعمامها وخواله وخوالها واخوتها وخواتها واخوته
بكونه متفقين على موعد الجاهه ( العطوة ) وكتب الكتاب
في بكتبوه بالمحكمة وفي بجيبو الشيخ على البيت طبعا هاي احلى
طبعا حسب العادات النابلسية العطوة لازم تكون الجمعة بعد صلاة العصر
بروح الاب بجمع حبايبه
تفضل عنا ابو العبد يوم الجمعة عطوة
ايه على مين على فلانة بنت فلان
والله ياعمي جماعه اوادم
توكلوو على ربنا خلص الجمعه باجي ان شاء الله
والعريس بجمع اصحابه كمان
يوم الجمعة بتجمعو الحبايب والقرايب ( عقبال عند العايزين )
في دار العريس بستنو لا يجتمع الكل في دار العريس
وبوزعو يا عصير يا لميون ونواشف اذا بدون كتب كتاب اذا مع كتب كتاب في حبت شكلاته وكمان القهوة
المهم شو بدنا بطولة السيره
بس يكتمل العدد
تنطلق القافلة بسيارتهم للدار العروووس
ولازم الكل مع بعض
وبكون ابو العروس عازم حبايبه
وبستنو اهل العريس

المهم
حكينا تنطلق القافلة لبيت العروس
وفي الاغلب دايما بتكون العطوة كبيرة
يعني سيارات كثير وناس كثير
المهم بتحركو الجماعة وزوامير شغالة
والفلشرات كمان
والاشارات الحمرة بعترفوش فيها في العطوة
يا زلمة اطلع حمرة حمرة شو يعني محنا في عطوة ( هيك بحكو عن الاشارة الضوئية )
المهم بوصولو على دار العروس
طبعا بكون العريس اول ماركبو بالسيارات اتصل في العروس
حكالها
اه يا عيوني هينا جايين
وهي المسكينة بتنعجق وحالتها حالة
وبصير وجها الوان قوس قزح
بوصلوو واخير على بيت العروس
المهم بنزلو من السيارت وبستنو باب البيبت ليوصل الكل
وبكون اهل العروس محضرين حالهم
وبفوت اكبر واحد بالعيلة اول شي والعريس وراه ( هيك الاصول يا عمي )
المهم
بقعدووو وياحبيب بدهم ربع ساعة لا يقعدو
وبقدمولهم عصير اهل العروس كمان
بعدين بقوم اكبر واحد من اهل العريس
وبحكي ( صلو على النبي يا جماعة )
بسكوتووا كلهم
وبحكي حديث عن الرسول صلى الله عليه وسلم وايه عن الزواج
وبعدها بحكي احنا ال ****** جينا طالبين بنتكم فلانة الفلانية
ل ابنا فلان الفلاني
وان شاء الله تلبو طلبنا
المهم بقوم اكبر واحد من اهل العروس
ونفس الشي بحكي
اذا جائكم من ترضوه خلقه ودينه فزوجوه
موافقين ياعمي
وبحكي اقرائو الفاتحة
( امين )
بعدها مباشرة بقدموو الجماعة قهوة حلوووووووووووووووة
ونواشف ( من عند ابو سير اكيد )
وفي هاي اللحظة العريس المسكين بكون نازلين في بوووس
بسلم على كل الجاهة وببوسهم واحد واحد
مسكين هرووو هري
المهم وبعدها كتكات (ههههه لا بمزح )
مش ضروري
وبضلوو الناس خمس دقايق هيك شي
وبس يقوم واحد يحكي الله يجعلوو مبرووك يا جماعة
بتلاقي ماضل حدا كلهم روحووو
مرات بكتبو الكتاب في نفس اللحظة
او بعد الجاهة
ومرات بروحو على المحكمة بكتبووه
بس بيني وبينكم في البيت احلا ( شو محكمة من اولها )
يا لطيف يا لطيف

الحلقة الثالثة من خطوات الزواج

بعد ما خلصت مرحلة العطوة
منروح لمرحلة جديدة من الطريق للحياه الزوجية
هلاء في شي اسمه الشوفة
تعريف الشوفة : هي حفلة تقام لنسووان فقط والعرووس طعا بتكون العروس لابسة بدلة ومزبطة حالها
وبشوفوها اهل العروس و اهل العريس من النسوان الي ماشافوها
طبعا الشوفة بتكون اهلية محلية يعني مو هالعدد
طبعا الشوفة كانت زمان تقتصر على النساء فقط
اما هالايام
يا حبيبي زي العرو س بس فش فيها نقوط ( يعني بكون العريس الموجود )
وممكن يكون اخوانه واخوانها كمان
هلاء الشوفة بتكون دائما بعد العطوة ( او الطلبة )
طبعا في نابلس الشوفة بتنعمل في احد القاعات التالية لانها مو كبيرة ( يا في الحمرة او في سليم افندي المطعم او زينه او ليالي الشام ) او اذا كان العريس مسخمط مسكين بعملها في بيته
والشوفة بقدموو فيها عصير وشوكلاطه وزمان كانت بوظة وملبس
وحاليا صارت جاتوه وعصير
خلينا نسمع شو بحكووو النسوان في الشوفة
هلاء طبعا الشوفة كلها استغابة يا حبيبي شو بحكوو
يي ليش شعراتها زي كباش الغول ...
طلعي هذا مكياج هاذا طالعة زي المومياء ....
ستين عين تطرقها ....
هلاء طاولة ثانية :- ماشاء الله عليها بتجنن بتقول للئمر قوم اقعد محلك
اه والله عرف ينئي ....
اه هلاء هاي امها للعرووس اه عرفتها
بتكون كنت بنت خالت ام مرت خال عمت ام احمد جارت خالتي
(حد عرف شو بتفبرلها انا لسا ما حللتها )
بس بتعرفي يا ام اسماعيل شايفتها قصيرة
مسكينة العروس اللكل عليها ( هاي الشوفة يا عمي )
طبعا بس تخلص الشوفة بتصير مرحلة زيارات العريس لدار حماته
رايح جاي رايح جاي
وكل مره بجبله معاه شغلة للعروس ( مسكين بلشت مرحلة الطفر والفت )
وكيف حالك يا مرت عمي شو اخبارك
وببلش الله يخليكي يا حماتي والله مافي منك ( ياعمي الخوف بخوف )

و طبعاااااا

بعد الشوفة بكونو اهل العروس عازمين اهل العريس على العشاا

واذا ما عزموهم بنفس اليوم

بعزموهمم بيوم تاني وهاي فرض عيب الي بعملهاش

واهل العريس بردولهم العزيمة بعد باسبوع

وبعدها باسبوعين بالضبط ام العريس بتلم حبايبها

وبتاخدهم على شي اسمه فوئدة العروس

بتقولهم اتفضلوا على فؤدة خطيبة ابني

اوووو

بسالوها يا ام افلان

امتى بدك تاخدي الفقدة لكنتك؟؟

ومتعارف انه الفقدة بعد الشوفة وعزيمة التعارف

وبتروح ام العريس فاردة عضلاتها هي وتقريبا 20 مرة كحد ادنى

من سلفاتها ونسوان اخوتها وخوات العريس وعماته وخالاته وستاته وبنات عمه وبنات خاله

طبعاااا كل وحدة بتكون جايبه هدية

للعروس (بتخفف عليه من الجهاز)

وام العروس بتكون مجهزة ضيافة واشي اشي

وبتقووم العروس واحيانا بتكون مستحية بتفتح الهدايا قدام النسوان

واذا كانت مستحية بتقوم ام العريس او اخته

وبصيروا يفتحو الهدايا وكل وحدة بتقول هاي هديتي

وخلال الهدايا والضيافة لا يخلو الامر من بعض الاغاني على الطبلة

من اهل العريس والزغاريد كمان

تكاليف العرس في نابلس

4 الاف دينار المهر + الف دينار الشوفة اجار القاعه وشوية مكسرات وهديا + الف دينار مشاوير وهدايا لبيت الخطيبة (لستة شهور فقط تضاعف في حالة التمديد لسنه خطبة ) + الف دينار تكاليف الملاك ( جمعة الرجال) + الف دينار كروت العزيمة واجار التكسي لتوزيعهم + الف دينار اجار قاعة العرس + 500 دينار اجار بدلة العرس + و 300 شيكل اجار سيارة العرس و 100 شيكل زينة + اذا البيت ملك فعلى الاقل 3 الاف دينار اجهزة كهربائية وزيهم فرش منزلي ونصهم بين طراشة وكهرباء ونثريات للبيت والنص الثاني المنيوم للمطبخ وطناجر وصواني ومعالق ووووو + اما اذا اجار ضيفوا 2000 دينار اجرة البيت لسنه + 800 دينار تكاليف عزيمة العرس وفي العاده بتكون لكل من نقط العريس وبتكون بعد العرس باسبوع او اول جمعه بعد العرس + المباركة طبعا على حساب العريس بدو يقدم فيها عصير وشكلاته وفي ناس بتسـتأجر قاعه على بعضها تقريبا بدو كمان الف دينار + طبعا اول شهر دلال للعروس والاكل عند حماتها فما بتطبخ ولا بتعمل شي بس بعدها لحق اكل وشرب

طبعا يمكن انا نسيت شغلات كتيرة من باب التوفير مدينة جبل النار "" نابلـــــــــــــــــــس"" 1005

والله يعين العريس اذا كان موظف وغلبان وراتبه اخر الشهر يادوب يبل ريقه ويمكن يموت والديون عليه ويبلش ابنه البكر الله يرضى عليه يسدد ديون ابوه مدينة جبل النار "" نابلـــــــــــــــــــس"" 1035

سلامات ولما تسمعوا حدا بيحكي عن اسباب عزوف الشباب عن الزواج ما تستغربوا مدينة جبل النار "" نابلـــــــــــــــــــس"" 1047

الحلقة الرابعة من خطوات الزواج

خلصنا من العطوة وخلصناها بسلام
على الهامش العطوة بتكون على حساب اهل العروس من تقديم عصير لنواشف لشوكلاته للقهوة وفي اهل العريس بجيبو الضيافة معاهم
وعملنا الشوفة
على الهامش بالنسبة لشوفة تاني يوم كتب الكتاب الحماة بتتصل على كنتها وبتاخدها هي وامها وبتكون مع الحماة عمات العريس وخواته يعني بنزلوا جاهه على السوق علشان يجيبوا بدلة الشوفة وكمان الدهب ومكياج الشوفة وبعض الكماليات هدول برضو فرض عين وعيب اهل العريس ما يجيبوهم حتى لو ما عملوا شوفة لسبب من الاسباب لازم يجيبوهم وتقريبا بتكون تكلفة البدلة وطقم الدهب والكماليات ما بين 1500 دينار - 2000 دينار
وعزموا اهل العروس اهل العريس ليلة الشوفة على العشا
واغلب العشا بكون صواني مع مقبلات هيك كل اهل نابلس
وبعد باسبوع اهل العريس بعزموهم على غدا
وبعدها بكم يوم ام العريس بتتصل بتقول احنا جاين نفقد العروس
وبيجو النسوان وبفقدوها زي ما أسلفنا
هلاء زماااان كانت اطول خطبة شهرين او شهر ونص
وحاليا قليل الي بحب الخطبة الطويلة يعني ممكن اقصى شي 6 اشهر
وفي حالات نادرة بتوصل سنه او سنة ونص
المهم بمر اول شهر زمان
طبعا العروس الها يوم رسمي محدد تزور دار حماها فيه
وتقضيه عندهم
والعريس بروح بجيبها وكمان برجعها عيب تروح لحالها
وطبعا اول زيارة للعروس لبيت حماها بتكون حماتها مجهزتلها حضوور
والحضور هو هدية على زوق الحماة
طبعا اولها العروس بضل مستحية
وعين الله عليها
في حماوات بشوفو حالهم بكناينهم كل مشوار بروحواا
باخدو الكنه معاهم

طبعا خلال فترة الخطبة
العريس بلفلف العروس على قرايبه
طبعا اول شي عند دار سيده ابو ابوه وبعديها ابو امه
وبعدها ببلش بعمامه اول شي الكبير وبعديها الي بده اياه والعمات لازم الكيبرة وبس يخلص اهل ابوه بروح لاهل امه خواله وخالاته طيب هاي علشان يعرف العروس على العيلة بتكون زيارة لمدة ساعة زمان
ونفس الشي العروس بتعمل علشان تعرف عريسها على عيلتها
وطبعا لازم ياخدها العريس مشواير وكل مشوار لازم يشتريلها اشياء زاكية
كوكتيل وشوكلاتات غير العشا بالمطعم طبعا كل واحد وكرمه وزوقه
وكل زيارة بيجي عندها لازم يكون معاه هدية وكمان يعطي عروسته مصروف اسبوعي او كل يومين تلاته
والنسوان بسالوا شو جاب عريس بنتك
وشو بشتريلها ووين باخدها وطبعا على اجاباتها بحكمو اذا كنه كريم او لاء
ولا يخلو الامر من كروت الجوال للعروس
وكماااان خلال فترة الخطبة اجت مناسبة مثل رمضان اهل العريس باخدولها فقدة رمضان
شعبان بعزموها وباخدولها فقده كمان
راس السنه الهجرية بردو فقده
المولد النبوي بردو فقده وبالاسراء والمعراج وبالاعياد العيدية طبعا ولبسة العيد واول عيد للعروس بيجو عمام العريس واخوته وابوه بعيدوها (بعين الله ان شاء الله تكونو عرفتوا ليش زمان ما كانو يطولو الخطبة مدينة جبل النار "" نابلـــــــــــــــــــس"" 1002

)
هاي خلال فترة الخطبة
واذا كان العريس مجهز الدار بكون ريح راسه من الفلفه على المحلات
واذا كانت الدار فاضية ببلش يروح ينقي العفش هو والعروس وحماته وامه
ووبلشوا مناورات
طبعا العروس متفقة مع امها على اشاره معينه اذا اوك والعريس نفس الديزاين
وبجهزوا البيت وكل شي تمام وبكونو حاجزين قبل بوقت قاعة العرس
العرس بكون اما بسليم افندي او البلور (الديوان العربي) سابقااا كانوا هدول اكبر قاعات والناس بتستهلهم لانهم بالدوار
وفي قاعة فندق القصر قليل بعملوا فيها لانها برفيديا وبعيدة حسب نظر الناس
اما حاليا في قاعات كتير ما شاء الله وكل وحدة احلى من التانية
وكمان بالنسبة للملاك اما بكون قبل العرس بكم يوم او قبل العرس بساعتين

وين وصلنا
اه عند الحكي على الملاك
هلاء بكون قاعد هو والخطيبة وبتكون حماته ( الله يخليله حماته يا عمي )
بتكون قاعدة معهم
شو رئيك مرت عمي نعمل الملاك بشهر 7
والله يا ابني ما بعرف اسال ست الحسن ( تؤبرني انا )
المهم بتفقو على موعد الملاك
وبروح هو وخطيبتوو بجيبو 12 نوع كروت
وبفرجيهم العريس ل امه والعروس ل امها
مفاوضات تحت الطاولة وفوق الطاولة
واخيرا بختارو الكرت الحلو
المهم بروح المكسين وبحكي للزلمة الي بطبع الكروت خلص بدي هاد الكرت
وبدفع حق الكروت ( الفت باولها طول بالك حبيبي )
وبروح على قاعة سليم افندي ( النقابات ) شو يا عمي المعازيم كثار
يعني بأكد الحجز بشهر 7
وبحطله 4000 شيكل ادنى حد طبعا
( مسكين ارتفعت حرارته الزلمة )
المهم بروح على البيت شو مبسوط
وبحكي ل امه اه يما اليوم حجزة القاعة خلص واخير لقيت كل القاعات مليانة
وبتصل في الخطيبة بحكيلها كيفيك واشيائات زي هيك
وبححكيلها خلص الكروت في الطباعة وحجزة القاعة اليوم
بتحكيلووو يييي تسلم ياربي والله فرحتني
هو بس تحكيلوو هيك بنسى اسمه اخينا وبنسى اصلا شو دفع
المهم
هلاء عبين ما يطلعوو الكروت بكون هو بلش يحط قائمة باسماء المعازيم
وهي كمان بتحط قائمة ( يعني اهلها )
يعني 250 كرت لكل واحد
بس دايما اهل العريس باخدو اكثر كروت ( عشان صحابه وهيك شي )
المهم طلعو الكروت من الطباعة بروح العريس بعطي حصة خطيبته
على الباب وبكون مستعجل بحكيلها خلص بشوفك بكرة بدي لحق اكتب عليهم
بروح على الببيت مستعجل معمي أمارو المسكين
بوصل وبطول الكروت و القائمة
وبكون ابوه فوق راسوووو
شو يا ابي عزمت فلان
ييي نسيته هلا بكتب اسمه
طب وفلان اه
ييي نسيت اكتب اسم ابنه شو اسم ابنه
وهيك بخلص كتابة الكرووت
وحطهم بكرتونة وبطلع بسيارة وببلش من الجبل الشمالي
ونزل بنزول يعني بشتغل بالترتيب
وبشوف فلان بطريق احمد
كيفك حبيبي ؟؟
اسمع ملاكي يوم الجمعة
لا جد بتحكي
والله مبروووك
4 بوسات هدول ضروري
خود هي كرتكم
من 3 لل 5
مش متيجيش بزعل منك
له يا شيخ احنا الي منيجي
المهم وبكمل مشواره
وبخلص الكروت وبوصل على البيت
مو قادر يوقف طبعا الملاك بعد يومين

كالعادة لدينا في مدينة نابلس الزيارات النابلسية المتعارف عليها

بدي أحدثكم ع بعض الزيارات اللي هي بالأغلب بتكون نفس الشي
ولما بحكي فيها الكل بكون عارف شو بحكي وكاني بحكي عنو
ذهبنا لزيارة احد الاقارب
وحين وصلنا الى البيت..
استقبلنا اهل البيت بالترحيب والاستقبال الحار " مع انهم بكونو قبل بيوم شايفينك"
دخلنا الى فناء المنزل وبدأنا بتبادل أطراف الحديث والذي يبدأ بالعادة بجملة . اليوم شوب وبكرة برد
وفي منخفض بكرة وكيف الجو الاسبوع الجاي بعد بوقت صغير بهلو عليك بمشروب بارد
وبحل وقت صمت يكسره صوت احد الاطفال بضحكة او عمل مصيبة وكل الأنظار تتوجه اليه
لتكسر حالة الصمت
وحينها يصبح الحديث عن الاطفال وانو قرب يمشي وطلعلو سنان وصار يحكي بابا ومن هالحكي
وانتو مش غشما عن اهل نابلس
واحنا بنحكي وعين الله علينا بدخلو عليك بالبزر والمكسرات ولازم كل شي تاكل منو بلاش حد يزعل
وبتبدا النسوان كل وحده تحكي هي والي معها قريبة عليها وبتنفتح مضبرة الله وكيلك

بعد شوي اذا كان في امر عائلي بسيرو يحكو فيه " عرس, حفلة, ميتم , عزيمة "
وبتركوش حد من اذاهم
وبهاي اللحظة بسيرو النساوين يطلعو عيوب فلانه وفلان
وفلانه بتعرفش تتمكيج
والحمرة لنص تمها والمكياج سايخ , وتمها كبير وفلانه حماتها حاكمتها
وفلانه جوزها بضربها ومن هالحكي
وبجييو كاسة شاي تسلايه ولازم تشربها بلاش يزعلو
وبجيبو هالنفس والاراجيل وبتنقلب الدار قهوة

بعد شوي بدخلو عليك اهل البيت بجاط فواكة وببلشو يقشرو فواكة بتكفي لعشر ايام
وبتكون مش ببالك اشي , والشرط لازم تاكل ولا بزعلو
بعد هيك بكون مش ضايل اشي للتقديم الا اذا في جاتوه او جلي او أي اشي تاني للتقديم
والشرط انك تاكل بلاش يزعلو
بسير هيك وقت الترويحة اللي بكون الواحد يحسبلها من اول ما يدخل البيت
يا الله .. يلا اسمحولنا خلينا نقوم عالبكير
الرد بكون والله ما بتقومو هي القهوة عالنار وهي اصلا بكون ما الها علاقة بالنار
ولسا محدش مفكر يعمل قهوة
بعد نص سيعة بتيجي القهوة ووقت ما بنشرب القهوة بكون الحديث بنهايته
وباغلب الوقت بكونو ساكتين لانو الحكي خلص
بنشرب القهوة وبنقول يا الله وبكون الواحد بستنا بهاللحظة عاحر من الجمر
قد ما اكل ماضل مكان يتنفس
واذا ما اكلت من كل شي بزعلو منك
واحنا على عتبة الباب بدنا نروح
بتذكروا النسوان شي شغلة مش حاكيينها وهات يا لت وحكي وعجن
وبدها القصة نص ساعة زمن
وهاد اذا خلصوا وهاد هو حديث العتبة
وبعد ما يخلصوا بحكوا
يارب ما تواخذنا اذا استغبنا حدا" بكونو مش مخليين حد من اذاهم"
هيك العادات
شو بدنا نعمل

احيانا بتنسا حالك وبتكون الزيارة حلوة
واحيانا بتتمنى الوقت يمر بسرعة

وكل هالشي بضل من عادات اهل نابلس وما بقدرو يتركوه وبضل لولد الولد

وفي شي حلو باهل نابلس
بضلو اهل الكرم

هآآي الكنآفه النآبلسيه

وهآآي منآكيش زعتر ترى مشهورين فيها كثير احنآ

مدينة جبل النار "" نابلـــــــــــــــــــس"" 2649_p138654

مدينة جبل النار "" نابلـــــــــــــــــــس"" 5530_1184363213007_1346043781_30498686_7932390_n

الحلقة الخامسة من خطوات الزواااااج النابولسي

وصلنا عند الملاك زي ما قلتلكم في بعملوه بنفس يوم العرس
وفي بعملوه قبل باسبوع
وفي قبل بكم شهر

هلاء صاحب قصتنا رح يعمله قبل كم شهر من عرسه
******
الملاك بكرة ( صح )مسكين يا عريس
المهم
هلاء تحضيرات الملاك بتبدا بدو ينزل على السوق هو والعروس يشتروا البدلة
باخد موعد معها بعد الظهر وبروح بجيبها من دار حماتو
طبعا جوزدانو مليان تذكرووو هاي
المهم بنزلو على السوق ( ويا حبيبي النسوان اذا نزلت معهم على السوق ما اطول بالهم بتفقع مرارتك يا اخي ) شو تعمل تحمل حبيبي
المهم بتحكيلو شو رئيك من عند
new man
طبعا هو من جوا بترتفع درجة حرارته اخينا
بس بحكيلها اه ليش لا
بس شو رئيك نمر عند ابسيس بضاعته مرتبه الثاني وشي فاخر على الاخر
بروحو عند ابسيس والبدلة للعريس مو للعروس اتذكرووو
بس الاصول بتحكي هي تختارها
ولا عشان يبين حالو رومنسي الاخ
(شو دخل الرومنسية بالبدلة ) مدينة جبل النار "" نابلـــــــــــــــــــس"" 1002

مدينة جبل النار "" نابلـــــــــــــــــــس"" 1002

المهم
ابسيس المسكين بملي الطاولات بدلات جميع الالوان والاصناف
والعروس بتحكي هاي لاء هاي احلا شو رئيك حيبيبي
بحكيلها انا برئي هذا القميص الزهري حلو منيح
بتحكيلو خلص منيح اذن مناخد القميص الازرق
( طب مادام بدك تجيبي على زوئك ليش سالتيني اخ بس الله يطولك يا بال ) المهم
بعد 4 ساعات بشتروو البدلة
بدها زغرووطة
لولولولو لي
هلاء الكندرة ( بعيد عن ادر السامعين ) بروحو واول محل بمر عليه بنئو كندرة على السريع يعني بعد ساعات من القياسات
وبكون العريس مرارته فقعة وطفا خلص
اما العروس عين النبي تحرسها لسا بنشاطها
مهو روح قلبهم النسوان يتسوقو
shopping
Razz

المهم طبعا وخلال الطريق بتاخد فرصتها وبتشك بايد خطيبها
وبتمر من جنب محل بدلات شي من التقيل الغالي
حبيبي خلينا نفوت نشوف بس نشوف البدالات عند هاد
بفوت
وبخرج شاري 3 فساتين
مدينة جبل النار "" نابلـــــــــــــــــــس"" Smile

مدينة جبل النار "" نابلـــــــــــــــــــس"" Smile

( ضحكت عليك يا مسخم ) كمل كمل
المهم صارت الساعة 5.30 خلص روحت
بحكيلها يلا بدي اروح مش قادر اوقف متت من المشي
بتحكيلووو اه يلا وصلني وروح حبيبي
بوصلها وعلى الباب بتكون واقفة حماته هلا يا ابني
لا ربنا الله حماته منيحة
فوت تغدى يا ابني
من هون لهون بفوت باكل لقمة على السريع وبروح على البيت بنام زي القتيل
صحيح الجزدان في فكة بس كم شيكل
مدينة جبل النار "" نابلـــــــــــــــــــس"" Smile

الله بيسرها
الملاك دايما بكون بعد العصر
واغلب الملاكات يوم الجمعة
طبعا سموو ملاك لانها تصبح ملك زوجها
وبحكو عنا فلان املك على فلانة
طبعا زمان كانو يكتبووو الكتاب في الملاك انا هيك سمعت
على ذمت الراوي ( شو دخلني انا ) المهم
هلاء العريس بكون معجوء في يوم الملاك
عند الحلاء
شو ساعة ونص
من هون زبطلي السكسوكة
والسوالف
بفرفطلوو روحو
المهم بخلص وركض على الحمام
بتحمم وببدا يلبس ويتهندز
بنادي على امه اه امي
شو رئيك كيف اللبسة
ماشاء الله عليك يما بترفع الراس
الله يحماك من عين جارتنا دير بالك وانتا خارج
وطبعا اذا كانت امه وعماته وسته بصيرو يهاهولو
شوية زغاريد
مدينة جبل النار "" نابلـــــــــــــــــــس"" Smile

المهم العريس واهله لازم يكونه في القاعة
قبل ب 10 دقايق دايما من موعد الملاك
طبعا اكيد عصير ليمون وكولا واذا كان وضعه منيح بقدم كتكات شنكي
واذا كان مسخم من هاي الشوكلاته ام 3 بشيكل
مدينة جبل النار "" نابلـــــــــــــــــــس"" Smile

الله يكون بالعون
طبعا بسطفووو اهل العريس اولا ابوه
بعدها العريس واخوه وعمه
وبعدين ابو العروس
واهلها ارجال
على الباب بكونو
واقفين وكلوو شياكة
وبضلو واقفين ساعتين هيك يحرام
والعريس بدا يدروخ
خلص سكرت معاه
الكل ببوس فيه
الله يجعلوو مبروك عمي
اربع بوسات
لازم لا مفر
خلص الملاك اليوم

كلمات اغنية امو يا امو

إمو يا إمو يخليلو إمو ........ سبع كناين تعبر على إمو

جابتلي البصل ... و ما باكل بصل
و بشهر العسل ... لحقتني إمو

إمو يا إمو يخليلو إمو ........ سبع كناين تعبر على إمو

جابتلي فقوس...وما باكل فقوس
حية بسبع روس ... تقرصلي إمو

إمو يا إمو يخليلو إمو ........ سبع كناين تعبر على إمو

جابتلي شمام ...و ما باكل شمام
حتى عالحمام ...فاتتلي إمو

إمو يا إمو يخليلو إمو ........ سبع كناين تعبر على إمو

جابتلي بطيخ ...و ما باكل بطيخ
حتى عالمريخ...طلعتلي إمو

إمو يا إمو يخليلو إمو ........ سبع كناين تعبر على إمو

جابتلي هالشاي...و ما بشربو الشاي
الأبريق و الكباي...كسرتهن إمو

إمو يا إمو يخليلو إمو ........ سبع كناين تعبر على إمو

جبلي السجادة...وما لو بالعادة
انهرت السجادة...من دعسة إمو

إمو يا إمو يخليلو إمو ........ سبع كناين تعبر على إمو

روُح سوق الكسا محشي.... يا حبُابه
و جميل أخد النغشة...يا حبُابه

و روح سوق البندورة ... يا حبُابه .....
جميل أخد غندورة... يا حبُابه

يا ناس صلوا ..... عالنبي
و الورد فتح عِنابي

يا ناس صلوا ... عالنبي
و الورد فتح... عِنابي

وهادي العروسة.....مباركة
على العريس....مباركة

و يا حماة كوني برررررداً ... و سلاماً على عروستني

من ااغاني نابلس الشعبيه في الاعراس

قبّضوا حقـــك بالديوان ميت ليرة وألف ريــال
يللي سبيتي الخيالة يا فلانة
يا جهازك مالي الشنتات ما شاله شيالـــــــــــــه
يللي سبيتي الخيالة يا فلانة
أبوكي خرج زعـلان وعريسك خرج فرحان
يللي سبيتي الخيالة يا فلانة
روح سوق الترويــــــــحة يا حبّابة أنهوا أخد منيحة يا حبّابة
وفلان اخد منيـــحة يا حبّابة
روح سوق الكوسا محشي يا حبّابة أنهوا أخد نغشه يا حبّـــابة
وفلان اخد نغشه يا حبّابة
روح سوق البطـــــــاطــا يا حبّابة أنهوا أخد خياطة يـا حبّـابة
وفلان أخد خيــاطة يا حبّابة
روح سوق الباميــــــــــــا يا حبّابة أنهوا أخد غاوية يــا حبّابة
وفلان أخد غاويــة يا حبّابة
روح سوق البنــــــــدورة يا حبّابة أنهو أخد غندورة يا حبّابة
وفلان أخد غندورة يا حبّابة

نابلس بلد الحضارة والعمران محفور اسمها بالقلب من زمان الله يحميحا

يسعد قلبك يا نابلس وربي يخليك ويخليلك ولادك يا جبل النار

يسلموووووو هالديات فراشة المنتدى

ويعطيك العافية على هالمعلومات الحلوة ..

وننتظر منك تعرفنا على بقية المدن .

تحياتي لك منى ....

عاشق الغروب

يسلمو عاشق تحيااااتي الك

» نور منتدى العشاق بالعضوة الجديدة ""دلوعة زماني""
» بدي احلى ترحيب بالعضو الجديد "" تيتو ""
» رحبو معي بالعضو الجديد "" fathawy ""
» المكياج النار..
» اربعة عشر عملا تنجي من النار